De Swoorpunkt liggt op de Billen

Birte Pauls, MdL Bild: SPD SH

Martin Habersaat, bildungspolitischer Sprecher der SPD-Landtagsfraktion, und Birte Pauls, Vorsitzende des AK Bildung im Beirat Niederdeutsch, legen eine „Leistungsbilanz Niederdeutsch“ vor:

De Landsregeren ünner Heide Simonis (SPD) harr seggt, se weer inverstahn mit dat Verlangen vun de Plattdüütschen, ehr Spraak ünner dat Dack vun de Landsverfaten un de Europääsche Charta för Regional- oder Minnerheitenspraken zu stellen.

Üm op düssen Grund to buen, hett de Landsregeren ünner Torsten Albig (SPD) enen Handlungsplaan Sprakenpolitik maakt. Dor finnt man ok, wat de Plattdüütschen verlangt hebbt. De Swoorpunkt liggt op de Billen. Na den Handlungsplaan schall „Plattdüütsch in’n ganzen Billensweg vun de Kinnerdaagssteed bet to de Hoochschool verankert“ warrn.
Goot is dat ok, dat Torsten Albig Plattdüütsch wedder in’t Opgavenflach vun de Minnerheitenbeopdragte opnahmen hett. Wi bedankt uns bi Renate Schnack, de as Beopdraagte vun’n Ministerpräsidenten engageert för Däänsch, Freesch un Plattdüütsch arbeidt. Se hett so männicheen Vörslag an’t Parlament geven.

In düsse Legislaturperiood kunnen wi al en poor Saken ümsetten:

1. To’t Schooljohr 2014/2015 is en Modellprojekt in 27 Grundscholen mit twee Weken-stunnen in’t Fach Nedderdüütsch anfungen worrn. Intwüschen sünd dat al 29 Scholen. An’t Enn warrt hier de Klassen 1 bet 4 düssen Ünnerricht op Frömdsprakenniveau kriegen. Aktuell warrt al 1600 Kinner över düt Modellvörhebben beschoolt, dat ja en anwassen Modell is.

2. As Grundlaag för den regulären Ünnerricht is en Leidfaden för den Nedderdüütschün-nerricht an Grundscholen in Sleswig-Holsteen formuleert worrn.

3. En Expertengrupp hett en Lehrwark „Paul un Emma“ för den systemaatschen Grundschoolünnerricht in de eerste un twete Klasse buut.

4. De Autoren vun’t Lehrwark „Paul un Emma“ hebbt bavento en Lehrerhölp („Handreichung“) to dat Lehrwark utarbeidt. Dat Institut för Qualitätsverbetern an Scholen Sleswig-Holsteen (IQSH) hett de nödige Technik praatstellt.

5. Ok sünd finantschelle Middel praatstellt worrn, üm so’n Lehrbook ok för de drütten un veerten Klassen uttoarbeiden. Bi düt Projekt hett de Europa-Universität Flensborg dat Leid in de Hand.

6. Geld is togeven worrn för Bökerkisten an de Modellscholen und annere Grundscholen, de noch buten dat Modellprojekt Plattdüütschünnerricht geven doot.

7. In de Europa-Universität Flensborg, wo der Swoorpunkt vun de Lehrerutbillen liggt, is in’t  Seminor för Germanistik en Afdelen Nedderdüütsche Spraak un Literatur as egenstännige Organisatschoonseenheit inricht worrn. Se is mit en Honororprofessur un en Lehrkraft för besünnere Opgaven för Nedderdüütsche Spraak un Kultur un ok Organisatschoon in’t Lehrfach Nedderdüütsch besett. För de Studentinnen un Studenten is Nedderdüütsch in’t Bachelor- un Masterstudium dorbi.

8. Dat IQSH hett wiederhen enen Landsfachberader för Nedderdüütsch. Bavento hett dat  IQSH de Koordinatschoon vun de Regional- un Minnerheitenspraken an de Scholen kregen.
Jede Düütschlehrkraft in Ubillen mutt en Modul Nedderdüütsch afsolveren.
Dat Zentrum för Nedderdüütsch in’n Landsdeel Holsteen in Mölln is dat IQSH towiest worrn.
Dat Zentrum för Nedderdüütsch in’n Landsdeel Sleswig in Leck büdd Zertifikatskursen för Multiplikaters in Scholen un Kinnerdaagssteden. Wat ünnerricht warrt, reckt vun Spraakgeschicht över Woortschatt un Grammatik bet hen to Didaktik un praktisch Arbeiden.
Mit de Stellenutschrieven för’t Wedderbesetten vun’t Zentrum in Mölln sünd dat eerste Mal Standards för beide Nedderdüütschzentren fastleggt worrn: Instellkriterium de plattdüütsche Spraak beherrschen in Woort un Schrift, Beschrieven wohen de Arbeit gahn schall un wat man leisten schall.

9. För dat Digitaliseren vun en plattdüütsche Grammatik hett de Ministerpräsident Geld togeven.

10. Ok för dat Digitaliseren vun de SASS Plattdüütschen Rechtschrievregeln geev dat en Finanzhölp vun’n Ministerpräsidenten.

11. Un de Opbu vun en  plattdüütschen Online-Wöörterbook is mit en Finanzsprütt vun’n  Ministerpräsidenten mööglich worrn.

12. Na enen Vörslag vun de Minnerheiten- un Plattdüütschbeopdragte vun’n Ministerpräsi-

denten is Plattdüütsch starker in de Verfaten verankert worrn. Dor heet dat nu ok noch: „Das Land schuult und föddert… Nedderdüütschünnerricht an öffentliche Scholen.“

13. Nederdüütsch is in’t Lehrkräftbillensgesett verankert worrn, wo dat nu heet: „… ok de

Bedüden vun’t Nedderdüütsche för dat Land Sleswig-Holsteen is as besünnere Anforderung intobetrecken.“

14. Plattdüütsch is in’t ännerte KiTa-Gesett starker maakt worrn, denn ok Regional- un

Minnerheitenspraken schüllt in KiTas ehren passlichen Platz finnen.

15. Bi’t Bemöhen, den Stand vun de Regional- un Minnerheitenspraken in all de Medien to verbetern, hett Sleswig-Holsteen, as de ZDF-Feerrnsehraat nie besett warrn müss, enen gemeensamen Platz för de Dänen, Fresen un Plattdüütschen inricht.

16. Na dat ännerte Landsverwaltensgesett köönt Börgerinnen un Börgers sik mit de charta-schuulten Regional- un Minnerheitenspraken Däänsch, Freesch un Plattdüütsch an de Verwalten wennen un bruukt eventuell nödige Kosten för’t Översetten nich övernehmen.

17. De Landsregeren hett in ehr zentral Personalmanagement bi dat, wat dat Personal könen schull, ok de chartaschuulten Spraken Däänsch, Freesch oder Plattdüütsch opnahmen.

Wi müchen, dat wi wiedermaken köönt, den Handlungsplaan ümtosetten, t.B. den Nedderdüütschünnerricht an 10 Modellschulen in’t Sekundorrebeet inföhren un Nedderdüütsch as en richtig Schoolfach utwiesen.

Keine Kommentare vorhanden

Machen Sie bei der Konversation mit.

Ihre E-Mail-Adresse wird nicht veröffentlicht. Erforderliche Felder sind mit * markiert.